Nikodema Rancāna konkursa nūslāguma pasuokums nūtyka 28. septembrī Kruoslovys kulturys nomā. Padūtys pīcys sudobra pokovsaktys i divys specialuos bolvys.
Nominacejā par īguļdejumu i sasnāgumim latgalīšu volūdys, kulturviesturis i nūvoda vuiceibys īvīsšonā i īdzeivynuošonā školā bolvu sajēme: Ludzys Muzykys pamatškolys školuotuoja, folklorys kūpys “Iļža” vadeituoja Dace Tihovska. Kai saceja bolvys padevieja Latgalīšu volūdys i literaturys školuotuoju asociacejis vadeituoja Veronika Dundure: “Daudzu školuotuoju kasdīna i labi padareita dorba atslāgs ir uzadreikstiešona. Dace uzadreikst vaira, kai nu juos prosa i sagaida.” Jai tyka padūta ari Latgolys Etnografiskuos viestnīceibys eipašuo bolva – lele pošdarynuotā etnografiskā tautystārpā. Taipoš bolvu itamā nominacejā sajēme Viļānu Muzykys i muokslys školys školuotuoja Anita Vulāne, kuru atbaļsteit beja atbraukuši ari juos školāni, kū školuotuoja īsaista latgaliskuos nūtikšonuos. Ari Anita tyka sumynuota divys reizis, partū ka kliva par pyrmū Latvejis Izgleiteibys i zynuotnis darbinīku orūdbīdreibys (LIZDA) īdybynuotuos eipašuos bolvys – smiļkšu stuņdinīka – īgivieju. Vairuokys bolvys īgiviejis sovuos uzrunuos lyudze pīdūšonu sovom saimem, sovim bārnim, partū ka leluokuo laika daļa pavadeita školā, ryupejūtīs par cytu bārnim. Smiļkšu stuņdinīks ir kai simbolisks atguodynuojums tam, ka dzeive naapsastuoj ni iz šaļteni i sova šaļts juoveļtej ari sev.
Latgolys Etnografiskuos viestnīceibys vadeituoja Iveta Seimanova, kas ir ari PII “Annele” školuotuoja Reigā, na tik padeve eipašū bolvu, bet ari poša tyka pi N. Rancāna bolvys. Žureja nūviertēja juos sirdsdorbu kai bārnuduorzā, tai uorpus tuo. I. Seimanova ar sovys komandys paleidzeibu jau ir realiziejuse vairuokus projektus, kas uztur etnografiskuo tautystārpa izgleituošonys, komplektiešonys i pietnīceibys dorbu. Kai saceja poša dareituoja – 80. lele nuokamajā nedelī ceļuos iz Sielejis kongresu.
Nominacejā par radūšu i psihologiski atbolstūšu pīeju muoceibu ci studeju vidē gūdynuoja divys školuotuojis: Kruoslovys Varaveiksnis vydsškolys ilggadeju školuotuoju Irinu Gončarovu i Rēzeknis Vaļsts pūļu gimnazejis direktori i svešvolūdu školuotuoju Olgu Burovu.
Taipoš atzineibys i Latgalīšu kulturys bīdreibys, Rēzeknis Tehnologeju akademejis, a LIZDA bīdrim ari sovys organizacejis saryupātuos bolvys, sajēme: Inta Lāce, Rēzeknis suokumškola, Sarmīte Vaģele, Daugovpiļs Draudzeiguo aicynuojuma vydsškola, Nadežda Adamoviča, Kruoslovys Varaveiksnis vydsškola, i Inguna Pašāne, Nautrānu vydsškola.
Nūslāguma pasuokuma daleibnīki varēja prīcuotīs leidza ar nominantim par eisajim video par školuotuojim, īsasaisteit attālu rēbusa miniejumūs, baudeit Kruoslovys pusis muzykalū i kulinarū montuojumu. Vīnkuorši sirsneigi pavadeit laiku sūpluok, informej Latgalīšu kulturys bīdreibys vadeituoja Ilga Šuplinska.
Anatola Kauškaļa foto