– Mes saimē bejom trejs mōsenis. Vacōkō pīskatēja, auklēja i kikuragā nosōja pedeleiti, maņ vysur beja jōīt leidza. Vokorūs, kod mameņa ap lūpenim gōja, Lideņa sādynōja myusus kuknī iz palūdzis i lyka vārōt mōkūņus. Tei beja breineiga spēle, ar acim īnirt dabasūs i īraudzeit mōkūneišu začeiti, kačeiti, eņgeleiti. Šudiņ jaunajōs bazneicōs viers oltora lūgi ļaun acs gremdēt dabasūs i īraudzeit, kai eņgeļu pulki gavilej.
Atmiņōs dzeivoj tei sāta i tei radeja, kas nasaprūtamā volūdā runōja, i kliets, zam kurys varēja nūsaglobōt, kod kaidu škodi padarieji; i tys mežeņš i krysts pi sātys ceļa molā. Myusu, bārnu, svāts pīnōkums beja tū apkūpt, puškōt i vysod garomeimūt pōrsakristeit.
(Anita Graudiņa (dz. Malachovska) Rēzeknē 19.04.2023.)
Biļdē – trejs mōsenis ar mameņu 1952. godā.
Saglobōta viestuleite babai
Bet vysvaira konkursā uzrunōja 1949. goda saglobōtō viestuleite babai, kuru Anitys kuņdze uzticēja konkursa laikā ar itaidu komentaru: “Itei nūdzeltiejušō laika zūba skartō viestuleite babeņai iz Sakstagolu munā vōrdā raksteita 1949. godā, kod maņ beja seši gadeni i skūlā es vēļ nagōju. Kas rakstejs? Moš mameņa, moš vacōkō mōseņa, maņ klōtasūt. Tū vairs nikod nauzzynōsim. Vysi myužeibā...”
4. XI 49. g.
Sveicīņs nu Anitas!
Kōpēc Tu, babeņ, naatbrauc pi myusim! Mes Tevi gaidom kotru dīnu kai sauleites. Myusu Māreite (dz.VIII 49.) jau sōc smītīs. Vakar mes ar Lidu bejom mežā, nūlauzem paegleiti un atrodom divas sēneites! Pīplyucem ari bryuklōjus, kurus nūlykom pi krysta.
Vokorā beja sanōkuši bārni, ar kurim spēlējamēs leidz vālai naktei.
Paps vysu dīnu strōdōja pi radio. Ōbuļneicā uzvylka garu kōrti, kuru pīsēja pi ōbuļneicas ar drōti. Tagad radio spēlej lobōk.
Mes jau vysus dōrzus nūvōcem. Paleidzēju mameņai ari es. Strōdōju kotru dīnu nu agra reita leidz vālai naktei. Vīnu dīnu beju nūsastrōdōjuse tik stypri, ka uz teiruma atstōju nazi, kuru ūtrā dīnā atroda mama.
Tagad es mōcūs raksteit. Jau daudz burtu pazeistu i prūtu raksteit. Ar mozū Ļusi es naspēleju. Skraidu vairōk vīna pati ap ustobu.
Šudiņ es šyvu mozajam Bonzam kleitas, blūzi un brunčus. Mama maņ šyun jaunu kleitu, gaiši zylu. Nōkušu nedeļu braukšu ar papu uz Reigu pi Andreiša.
Atbrauc, babeņ, pi myusim! Mes gaidēsim!
Uz redzeišonūs.
Anita Malachovska