Rēzeknis Centraluos bibliotekys sātyslopā www.rezeknesbiblioteka.lv īzvītuota i kotrs var apsavērt karti, kas tyka izveiduota jau 2015. godā ar zemnīku saimisteibys “Juri” saiminīku Lidejis i Jura Lubuonu iniciativu projektā (ar Rībeņu nūvoda dūmis atbolstu).
Pi kartis tūlaik struoduoja: Maruta Latkovska (personeibu atlase i aproksti), kartografi Andra Zubko-Melne, Juoņs Nogda. Konsultanti sovuos jūmuos beja: Zane Cekule, Otīleja Kovaļevska, Tamāra Lapsa, Lideja Leikuma, Anna Stafecka i Valdis Šteins. Piec Administrativi teritorialuos reformys dati byutu juomaina, bet svareiguoks ir akcents iz personeibu, par kurom kartē atrūnami dati, deļ tuo – izmontuosim faktus, kas napalīk vaci!
***
“Latgalīts ir bejs, ir i byus eistyns latvīts, jis ir devs vuordu Latvejai i kruosys Latvejis karūgam, jis ir bejs par paraugu tautīšim ar sovim latiņu burtim. Jis ir stuoviejs i stuov par sorgu Latvejis austrumūs. Myusu zemeite iz sovu placu ir iznasuse gryutuokū, kū sevkurai tautai izlīk svešu zemu vaļdinīki. Navajag Latgolai ni sveša monta, ni napeļneitys slavis, Latgola grib byut leidzona ar cytim Latvejis nūvodim, paturūt sovu mēli i ticeibu, sovus vuordus i vītu nūsaukumus. Na par veļti pazeistamais Medisonys universitatis (Viskonsina, ASV) profesors, volūdnīks Vaļds Jurs Zeps, kuo golvonais dorbs volūdnīceibā ir “The Placenames of Latgola” (“Latgolys vītu vuordi”, 1984), raksteja, ka “..īrodums puorceļt vītu vuordus napīmāruotā formā ir myusu volūdnīceibys luosts i struope”. Sovukuort Hovarda universitatis (Vašingtona, ASV) profesors Jezups Leļs ir rakstejs, ka Latgolys vītu vuordu oficialuos formys ir piļneigi nadereigys zynuotniskim pietejumim. Lyudzami, napuorkruosojit i napuorgrūzit myusu, mes asom gona latvyski i ar sovu seņču montuojumu.” (Maruta Latkovska kartis īvodā)