7. decembrī Rēzeknē i tīšraidē škārsteiklā nūtyka literaruo konkursa “Latgolys prozys skaitejumi 2023” nūslāguma pasuokums “Proza i karbonadis”.
Latgalīšu kulturys kusteiba “Volūda”, sasadorbojūt ar festivalu “Prozas lasījumi”, catūrtū reizi izsludynuoja konkursu “Latgolys prozys skaitejumi”. Itūgod par uzvarātuoju 21 raksteituoja konkurencē tyka atzeita literate, literaturzynuotneica Ilze Sperga ar stuostu “Breiveiba”. 2. vītu dabuoja Vita Briška ar stuostu “Kolteņa teiksmainais CV”, bet 3. – Sarmīte Trūpa ar stuostim “Par gūvi i marcipanu” i “Par zyrgim i uobelim”, bet atzineibys sajēme autoru Ilzis Aizsilys, Dāvida Rubena, Alda Bukša i Egitys Kancānis dorbi. Konkursa nūslāgums nūtyka 7. decembrī Rēzeknē, “IGGI bārs un karbonādes”, tū beja vareiba pīdzeivuot kai kluotīnē, tai tīšraidē. Nūtikšonā, kū vadeja Kārlis Taranda, izskanēja pīci nu septeņu konkursa laureatu dorbu. Muzykali konkursa nūslāgumu papyldynuoja grupa “Gandreiž 10nīkā”.
Ilze Sperga ir literate, literaturzynuotneica i publiciste, stuostu kruojuma “Dzeiveiba”, bārnu dzejūļu gruomotys “Vuškeņa iz pļovys” i cytu dorbu autore. Bejuse Latvejis Literaturys goda bolvys LALIGABA nominante, latgalīšu literaturys goda bolvys “Boņuks” vairuoku reižu sajiemieja. 2021. gods golā stuostu kruojuma “Dzeiveiba” stuosti aktrisis Ingys Misānis-Grasbergys skaitejumā izskanēja audio formatā ari Latvejis Radio 1 eterā.
Konkursā, kura devize beja “Es rokstu, bet voi tu skaiteisi?” tyka sajimts 21 autora dorbs kai latvīšu literarajā, tai latgalīšu rokstu volūdā. Īsyuteitūs dorbus vērtēja žureja, kurys sastuovā beja literaturzynuotneica Ilga Šuplinska, rakstneica i redaktore Jana Egle, literaturzynuotnīks Valentins Lukaševičs, konkursa “Latgolys prozys skaitejumi” treis īprīškejūs godu uzvarātuoja Annele Slišāne, kai ari gruomotu blogere Inga Gedžūne.
Konkursu organizēja latgalīšu kulturys kusteiba “Volūda” (bīdreiba “LgSC”), atbaļsteja literaturys festivals “Prozas lasījumi 2023” (Latvejis Rakstnīku savīneiba), Vaļsts kulturkapitala fonds, SIA “IGGI”, Volūdu sāta, latgalīšu kulturys ziņu portals lakuga.lv i žurnals “Domuzīme”, informej Kristīne Pokratniece, Latgalīšu kulturys kusteiba “Volūda” (bīdreiba “LgSC”).
Konkursa žureja par stuostu “Breiveiba”: “Dorbam ir lela energeja. Ilzis stuosts ir vīla puordūmom par myusu pošu kai skaiteituoju saškaltū, traumātū voi pagaisynuotū identitati. Dorba spāks: kai ba caur absoluti īrostu, sadzeivisku ainu paruodeit vairuoku paaudžu nūlemteibu, atkareibu, īdūmuotū breiveibu. Breineiga ir autoris variešona likt skaiteituojam īsajust kai muotis liktinī i bailēs, tai meitys naspiešonā puorkuopt muotis īzeimuotū rūbežu, pat fiziski nūbāgūt nu vysa, kas par tū atguodynoj.” Stuostu “Breiveiba” var puorskaiteit i nūsaklauseit https://ej.uz/IlzeSperga_Breiveiba
Ilze Sperga par 1. vītu konkursā: “Es nagaideju. Kai kotru godu, ari itūgod stuostu īsyuteju, kab podturēt latgaliski rokstūšūs autoru statistiku i konkursa organizatorus. Tys ir mozuokais, kū kai autors varu dareit, ka maņ ir svareigi, kab Latgolys rodūšuo telpa dzeivuotu.”
