Jau desmit godu Reigā dorbojās folklorys kūpa “Ceidari”, kurā apsavīnuojuši Reigā i apleicīnē dzeivojūši latgalīši. Niu, reizē aicynojūt iz koncertim 2. novembrī Reigā i 4. novembrī Bolvu nūvoda Bierzpilī, kūpa izdavuse digitalū albumu “Dzīduotumi, ļustātumi”, kas veļteits Bierzpiļs pusis dzīduotuojim i jūs dzīsmem.
Latgalīšu kulturys kusteibys “Volūda” folklorys kūpa “Ceidari” Reigā roduos 2013. gods majā, kod dzīduot grybātuoju aicynuojumam īsavuiceit jaunys dzīsmis i sasatikt, lai regulari padzīduotu, atsasauce etnomuzykologe Marta Sīle (tūlaik Vaivode), uzajemūt tamā šaļtī vēļ naformaluos dzīduotuoju grupys vadeišonu. Jau piec napylna goda dzīduotuoji jau kai folklorys kūpa “Ceidari” pīsadaleja sovā pyrmajā storptautyskuo folklorys festivala “Baltica” skatē.
Kūpys dzīduotuoji īt nu vysaidu Latgolys vītu – Aulejis, Baļtinovys, Bierzpiļs, Leivuona, Rūžupis, Stabuļnīku, Škilbānu, Vileks i cytu, deļtuo “Ceidaru” repertuarā pamatā ir dzīsmis nu itūs vītu. Itamā vosorā kūpa īrakstejuse Bierzpiļs (voi kai tūlaik sauce – Domopolis) dzīduotuojim i dzīsmem veļteitu albumu “Dzīduotumi, ļustātumi”, kas ir kūpys pyrmais albums. Pyrma tuo studejā īraksteita viņ kūpeiga dzīsme ar dzīsminīku Kārli Kazāku “Zīmeņa, zīmeņa”, kas īkļauta etnomuzykys izlasē “SVIESTS V”.
Albumā īkļautys 10 dzīsmis, kū sovulaik dzīduojuši Bierzpiļs apleicīnē dzymušī dzīduotuoji: Anna Bundža, Anna Stiernīks, Bronislava Romanovska, Ciprijans Pokrotnīks (zynoms ari kai literats Augusts Egluojs) i Marta Šmidte. Vysys dzīsmis jimtys nu LU Literaturys, folklorys i muokslys instituta Latvīšu folklorys kruotivis digitalajā arhivā http://garamantas.lv atrūnamūs materialu. Albums īraksteits studejā “Lauska” Reigā pi skaņu režisora Kaspara Bārbala.
Īskandynojūt jaunū albumu i jubileju, “Ceidari” aicynoj iz svātku koncertim Reigā i Bolvu nūvoda Bierzpilī. 2. novembrī koncerts skanēja Reigā, Rakstnīceibys i muzykys muzejā, i koncerta gosti beja folklorys kūpys “Dāre” (Daugmale) i “Dandari” (Reiga), kai ari dzīsminīks Kārlis Kazāks. Sastdiņ, 4. novembrī, 15.00 stuņdēs “Ceidari” aicynoj iz sasatikšonu Bolvu nūvoda Bierzpiļs saīta nomā, kur albums tiks izdzīduots kūpā ar folklorys kūpom “Saivenis” (Bierzpiļs) i “Rūžupis veiri” (Leivuona nūvods). Koncerts ir bez īīšonys moksys.
Bierzpiļs dzīsmem veļteitū albumu īrokstu finansiali pabaļstejuse Vaļsts kulturkapitala fonda mierkprograma “Latvīšu viesturiskūs zemu atteisteibys programa” i privatī zīduotuoji, informej Edeite Laime, Latgalīšu kulturys kusteiba “Volūda” (biedrība “LgSC”). Albums byus daīmams popularuokajuos muzykys straumiešonys vītnēs nūsaklauseišonai kai stereo, tai ari “Dolby Atmos” telpiskuos skanis tehnologejuos.
“Ceidari ir viļni, kas rūnās, kod iudinī īmat akmisteņu. Tai i mes sovulaik īsuocem ar vīnu dzīsmi, bet asam aizaviļņuojuši jau da desmit godu, “Ceidarim” palīkūt par naatjemamu latgaliskuma gabaleņu, pošim nadzeivojūt Latgolā. Prīca, ka ar jaunū īrokstu asam spiejuši izceļt vēļ kaidys Latgolys vītys dzīsmis i pastuosteit pasauļam sovu sajiutu par tom,” soka folklorys kūpys vadeituoja Marta Sīle.
“Ceidari” 2023. goda vosorā pi studejis “Lauska”
Elmāra Pēterāna foto