Nu jau divdasmytū reizi 29. junī Rogovka vysus aicynuoja iz Pīterdīnu. Itūgod tei tyka nūsvieteita ar jūkim, peršom, dzīsmem i dejom! I tam vysam pa vydu – ar pārkiuni, kai Pīterdīnā ir juobyut! Kai īrosts, Pīterdīnā gūdynuoti teik Pīteri! Kluotīnē beja tik treis Pīteri, bet vysi tyka gūdynuoti ar ūzula vaiņukim.
Svātki suocēs ar pīminis breidi Desetnīku kopūs, kur Dekteru amaterteatra režisore Ērika Bozoviča beja sagatavejuse Pītera Jurceņa dzejis lasejumus. Turpynuojuos svineibys Nautrānu sporta hallī – KN. Jau trešū godu Pīterdīnys pyrmuo dzīsme koncertā ir “Ar Reigys morāli”, kurai vuordu autors ir Pīters Jurceņš, bet muzykys – Sovvaļnīks aba Ingars Gusāns.
Koncerta suokumā tyka gūdynuoti tī nautrānīši, kas pīsadaleja akcejā “Rūtoj Rogovkā!”, kur vajadzēja sataiseit juoņazuoļu puškeiti voi nūveit vaiņuku i īkuort vīnā nu Rogovkys zuordu, nūsabiļdēt i atsyuteit foto organizatorim. Beja lela prīca, ka pīsadaleja 11 nautrānīši i radeja svātku sajiutu vysim īdzeivuotuojim. Ari literatu konkursa moto eistyn atbylst itai nūtikšonai – “Kotrai laimeigai dīnai gon jau ir kaids aizkura dedziejs!”. Tai nautrānīši radeja svātku sajiutu vysim puorejim!
Koncertā uzastuoja arī Vinsents Kūkojs, kurs izpiļdeja dzīsmi “Bryute” (P. Jurceņš, V. Kūkojs), kas īvadeja vysus iz humora nūts, kuru ar vysaidom peršom i pastuostim turpynuoja Cybuļu Jurs, Krapacu Ļuce i Krakopu Zintis. Jī pastuosteja ari par jaunū gruomotu “Groznuo kuorta” i cytom.
Literatu konkursa nūslāgumā tyka gūdynuoti kai laureati, tai izsaceitys pateiceibys par daleibu. Pateiceibu sajēme Veneranda Rimša i Rykovys jaunūs literatu kūpys “Dzejas garša” daleibnīki – Diāna Dimzule, Dace Vilcāne, Vasīlijs Krasnovs, Samanta Strogonova, Ketlīna Dukšta, Inga Strogonova, Dainuvīte Garjonova, vadeituoja Iveta Dimzule. Veicynuošonys bolvu nominacejā “Proza” i naudys bolvu 50 eiro vierteibā sajēme Lilija Limane. Nominaceju “Bārnu literatura” i naudys bolvu 100 eiro vierteibā, specbolvu nu LVLKŠA – Ilze Vovka. Veicynuošonys bolvys nominacejā “Dzeja” i naudys bolvys 50 eiro vierteibā – Maruta Avramčenko i Aija Mikele-Strušele. Nominaceju “Dzeja” i naudys bolvu 100 eiro vierteibā – Inga Kaļva-Miņina. Itūgod žurejis komisejā dorbuojuos Veronika Dundure, Anna Rancāne i Laura Melne. Izviertejūt dorbus i izzynojūt, kas ir tūs autori, žureja nūlēme pīškiert vīnu papyldu veicynuošonys bolvu 50 eiro vierteibā par nūvāruotū izaugsmi dzejis raksteišonā – Arvīdam Gļaudam.
Turpynuojumā pasuokuma apmaklātuojim beja breineiga īspieja pasaklauseit i padzīduot leidza folklorys kūpys “Upīte” dzīsmem. Piec dzīšmu koncerta suocēs ari daņču daļa, kur vysi tyka īsaisteiti rūtaļdejuos.
Pasuokums nūtyka ar Vaļsts kulturkapitala fonda mierkprogramys “Latvīšu viesturiskūs zemu atteisteibys programa” atbaļsteituos Latgolys kulturys programys finansialu atbolstu, informej Nautrānu apvīneibys kulturys pasuokumu organizatoru vadeituoja Inga Vigule.
Sveicam myusu kolegi Ingu Kaļvu-Miņinu
Inga konkursā gūdynuota nominacejā “Dzeja”
***
Laipni lyugti dabiskā pļovā –
Es soku i attaisu vuortus,
Kab īlaistu gostus bierneibys styguos,
Kur laimei navāga daudz.
Pučis i smylgys
Bišu i putnu dzīsmis,
Leli i mozi taureni, spāris i cyti kukaini
Lidoj i plivinej nu pučis iz puči,
I īlidoj taišni sirdī,
Kur bierneiba sapynus globoj.
Laipni lyugti – es soku
I attaisu vuortus i sirdis.
(Inga Kaļva-Miņina)