Jauna gruomota – dzejis kruojums “Ups, kūki i mes”

“Voi jiusu lobajai pusei vysys pusis ir lobys?” – ir vīna nu pasakaituošonu, ar kuru suocās juņa vydā izdūtais latgalīšu literatis Dagnejis pyrmais dzejis kruojums “Ups, kūki i mes”. Kruojumā apkūpuoti vaira nakai 70 pādejūs pīcu godu laikā raksteitī dzejūli, kurūs autore kaitojās ar dažaidu volūdu vuordim i simbolim, salīkūt sūpluok jiutu, pruota, piļsātys, lauku, realuos i digitaluos dzeivis paruodeibys i nūtikšonys. 
Literate, navaļstiskūs organizaceju aktiviste i jaunīšu projektu vadeituoja Dagneja (aba eistajā vuordā Dagneja Dudarjonoka) dzeju latgaliski roksta jau seņ, tok itys ir autoris pyrmais dzejis kruojums. Da ituo Dagnejis dzeja ir publicāta kūpkruojumūs. Kruojumā dzejūli, kas raksteiti latgalīšu rokstu volūdā, tok sovu reizi volūdā īsaskaņ ari Dagnejis dzymtuo – Vuorkovys – puse. Dzejūli ir sižetiski, autore pīsaskar ari filozofiskim vaicuojumim par laiku, dzeivis jāgu, ari par mīlesteibu pret ūtru cylvāku i dažaidom Latgolys vītom. Autore nasabeist lītuot ari myusdīneigus i dažaiduos volūduos raksteitus vuordus.
Dzejis kruojuma redaktore ir dzejneica, rakstneica i tulkuotuoja Vija Laganovska, muokslineica – Dana Vasiļjeva, bet izdeviejs – latgalīšu kulturys kusteiba “Volūda”. Kruojuma izdūšonu atbaļstejs Vaļsts kulturkapitala fonds. Kai duovynuojumu ar Latvejis Nacionaluos bibliotekys storpnīceibu, dzejis kruojumu sajims bibliotekys Latgolā, bet sevkurs interesents tū var nūpierkt kusteibys “Volūda” atbolsta platformā-veikalā voluda.lv. Taipat tys byus daīmams gruomatneicuos.