Konteksts. Nagļu tautys nomā 18. februarī nūtyka muzykals uzvadums “Es asu, tu esi Plōciņu Mase”, kurā beja dzīsmis, daņči i septeni skeči par Nagļu pogostu i Rēzeknis nūvodu.
***
Vasala, muna dōrgiņkō Kalipornijā. Cecileit, Nagļu trikmīņs "Es asu, tu esi Plōciņu Mase" beja myužeigs skaistums. 
Sirdssyltums plyuda pōri molom. I sātmaleits pi skotuvis, ar rūku darbenim, adeitim i austim izdaiļōts. Nu tim maņ vīns dzaltonu kabzečeišu pōreits tyka. Paļdis Marijai par itū breineigū dōvaneņu, kas ņiuļa kotru nakti munys djapeitis sylda. A nu bejušōs posta prīkšneicys Otilijis breineigīm gobelenim pi zala sīnys Latgaleite kotru apmīļōja.
Myužeigs skaistums! Sirds pamyra, kod īraudzieju ļaužu pylnū zalu. Okuleri aizsveida! Kū gveļžu, eistyn vaira napīmiņu.. Zosja soka, ka dzelu runōju. Kai gudreibys beņči gryb pamastūs Latgolys kōrmus atdzeivynōt. Ļauteņus iz sovom dzeravņom, foļvorceņom, solom atgrīzt. Pi reizes EiroSa-bys iztukšōtū "pašeli" nu latvjōnim i canadys zalta slūteņom atpesteit. Tūs to žāļ. Cīši smuki dzaltonī teirumi izaverās. Koč myusu nacinalōs pučeitis peipineitis našvakōkys. Myužeigs skaistums!
Vaicōsi, kai dzeravnis renimēt? Vysiņki tok aizalaiduši.. Vot, kai.
Vītejī gudreibys beņčeiši par pansinatim sacēle cenu. Pusūtru tyukšu (1480 eirikus) mēnesī prosūt. Nu kur tōm asjam, masjam, jugasjam ņiuļa liktīs ar sovu uboga simteni.. Jōbļaun ratunkys? Bļauņ ci nabļauņ – vīns peips. Vīna lyga – ni dzierd, ni redz tymūs beņčūs tykušī. Okli i kūrli palīk kai iz sitīņa. Myužeigs skaistums!
Byus viņ jōkustynoj myusu seņjōrim smedzeņu kaptureiši. I na tikai. I piersteni, i rūcenis, i kōjenis.. Tupu rōpu jōkužynoj sovys sotkenis. Puču dōrzeņā flokši sōks smaideit! A nu zemis spāks byus kaulūs.. Koč kropi jōīsēj.. Moš kazeņu iz pōrs sātom nūpierks voi panaimavōs, skolus plēss, žogorus laseis. Tymsūs vokorūs vakarēs.. Tolkavōs.. A ka bārni nu svešōm zemem atsagrīzs, i pi myusu bārnuki sōks dzimt, i slāgtōs školys otkon zumēs kai bišu strūpi.. Atdzims Latgola. Myužeigs skaistums! Zose soka, ka nazkod, pagōjušajā godusymtā, bejuse topā dzīsme “Vairōsimēs Latvejai..” Pādejais laiks itū saukli ceļt gaismā, koļeņc naasom izmērdeiti.. Myužeigs skaistums!
A Nagļūs, Ceceit, to beja prīca dvēselei i pēčōk mīsai! Smiejūs, vādaru turādama, osorys slauceidama, kod Nagļu tautys noma Annenis mjaituškys anekdotus iz dzeivis stōstēja. Vēļ i Gaigalovys “Apeiņs” smīdynōja. A kaids syltums plyuda nu skotuvis, kod pasarōdēja Modyunis Sauliskolna doncōtōjis. Myužeigs skaistums tys beja! Paļdis i paļdis acīs i aiz ocu muzykantam Jōneišam i jō ansambļam. Jō golvā dzyma ideja Plōciņu Masi tauteņōs vest. Izcēle mani kai vacu baku. Ar lelu Zosis gribiešonu i Puļgeņcis paleidziešonu. Paļdis vysiņkim tyvlejīm i tōlejīm, kuri pōrpiļdēja zalu, par manis pīminiešonu.
Myužeigs skaistums! A kaids ceļamaizis plōciņs beja! Kilogrami pīci, ka na vairōk. Paļdis Zineitei, kura itū gastiņci izcepe. Ēdem vysu nedeļu.
Tici voi natici, Cecilej, a laimis kormoni vairs nadūd mīra. Maltā jau brīst “Trešais Plōciņu Masis pestivals”. Kur tu spruksi? Byus jōbrauc. Da Tovys Kalipornejis patōli, a vot da Nagļu, Lūznovys voi Maltys – vīns kumeļa zvīdzīņs.
Ceceit, dōrgiņkō, lidoj šur! Moš da Jezupa dīnys paspiesi?
Aicynojam runōtōjus, stōsteitōjus, muzykantus iz tikšonūs Jezupa dīnā Maltā. Braucit gostūs ar sovom peršom. Padūmojit i syutit ziņu Maltys Masei ari Jius pa telepona numeri 26117782 leidz 12. martam.