Sagaidūt jau catūrtū oficiali svinamū Latgolys [kongresa] dīnu (27. aprelī) un popularizejūt latgalīšu rokstu volūdu, tymā izdūtōs grōmotys, aicynojam īsasaisteit rodūšajā aktivitatē “Latgalīšu grōmotys runoj”.
Cik saturiski bogōtu i skaistu grōmotu ir izdūts latgalīšu rokstu volūdā! Nu senejūs izdavumu viesturiskōs i poligrafiskūs īspieju īrūbežōteibys da myusu dīnu krōsainūs grōmotu plyudim – tys vyss ir myusu, latgalīšu, literaturys daļa. Nūslauceisim putekļus i ceļsim tū gaismā i pi reizis – radeisim jaunus vōrdu salykumus i ryndys, kas ļaus sev i cytim gon pasmaideit, gon aizadūmōt.
Pīsadaleit var kotrs interesents individuali, gon īsasaistūt kaidā nu grupom:
- školys (klašu grupys školōtōju vadeibā);
- bibliotekys i muzeji (individuali voi grupu dorbi);
- dzejnīki, rakstnīki (ar sovu voi kolegu izdūtūs grōmotu rodūšu apkūpōjumu).
Bibliotekā, sātā grōmotu plauktā voi internetā atrūnit grōmotys latgalīšu volūdā, salīcit tūs mugurenis vīnu iz ūtrys voi vōkus, taisūt vōrdu salykumus, teikumus voi pat dzejis ryndys i nalelus stōsteņus! Teksta lobskaņai var izmontōt saikļus i vōrdūs lūceit. Vīnā biļdē sakombinejit i nūfotografejit izmontōtōs grōmotys, klōt pīrokstit sagōjušū interesantū salykumu i da 20. apreļam atsyutit iz e-posta adresi byusim.viteji@inbox.lv, nūrōdit kontaktinformaceju (telefona numeri, e-posta adresi), vōrdu i uzvōrdu, pīsadolot individuali voi kaidā grupā; školu, klasi, školānus, kas īsasaistēja, i školōtōju; biblioteku i muzeju gadejumā – darbinīkus, kuri veidōja rodūšū dorbu, i personu, ar kuru organizatorim sasazynōt. Latgolys dzejnīki, rakstnīki aicynōti spēlētīs [popularizēt!] ar sovu voi kolegu grōmotu nūsaukumim.
Bibliotekys aicynojam mudynōt sovus laseitōjus pīsadaleit aktivitatē i aprelī izveidōt kaidu styureiti ar latgalīšu grōmotom, lai laseitōjs iz vītys, apmeklejūt biblioteku, var izveidōt sovu salykumu! Taipoš školōs itū aktivitati aicynojam izmontōt gon latvīšu volūdys stuņdēs, gon organizejūt nūvodvuiceibys stuņdis i rezultatu īsyuteit iz nūrōdeitū adresi.
Aktivitate tyka sōkta jau 2021. goda majā “Vietējās Latgales Avīzes” lopā “Byusim Vītejī”, i paļdis tim atsauceigajim, kas sovus rodūšūs atrodumus jau atsyutiejuši (jiusu darbeni tik īkļauti kūpejā daleibnīku sarokstā i vārtāti), bet nūteikti varit meklēt i radeit vēļ! Rodūšū aktivitati, Latgolys dīnai veļtejūt, organizej “Vietējā Latgales Avīze” i Rēzeknis Centralō biblioteka.
Saturiski interesantōkūs i originalōkūs dorbu autorim paradzātys bolvys. Piec konkursa salykumi tiks publicāti sātyslopā www.rezeknesbiblioteka.lv, lobōkī dorbi ari “Vietējā Latgales Avīzē”.
Ļausim runōt latgalīšu grōmotom!
Skaidrīte Svikša, rodūšōs aktivitatis idejis autore
