Projekts: Vineta Vilcāne – par puormaiņom dzeivē i latgaliskū kulturvidi

5. martā nūtiks Latgalīšu kulturys goda bolvys «Boņuks 2021» bolvu padūšonys ceremoneja, kab nūskaidruotu i gūdynuotu goda aktivuokūs, leluokūs i ītekmeiguokūs latgalīšu kulturys dareituojus, projektus, dorbus i sasnāgumus, veicynojūt, atteistūt i saglobojūt latgaliskū kulturvidi. Par speiti Covid-19 radeitajim īrūbežuojumim ari 2021. gods latgaliskajā kulturvidē ir bejs pīpiļdeits ar daudzim vierteigim i spylgtim nūtykumim. Tys ir aplīcynuojums tam, ka aktivi ļauds ari na tik vīglūs apstuokļūs naaizmierst dareit sovu dorbu, veltūt sovu laiku, izdūmu i talantus, kab eistynuotu dažaidys īceris.
Kaids ir bejs paguojušais gods i kaidi ir ituo goda izaicynuojumi – vaicuoju VINETAI VILCĀNEI. Juos vuords daudzim saistuos ar latgalīšu kulturys ziņu portalu lakuga.lv (bejuse portala žurnaliste i redaktore), radejis raidejumu «Kolnasāta» (ir bejuse tuo producente), dažaidim projektim, kas saisteiti ar latgalīšu volūdys vuiceišonu i latgaliskuos kulturvidis atteisteišonu (aktivi dorbuojusēs bīdreibā «Latgolys Studentu centrs» (kas tān ir bīdreiba «LgSC»), bejuse ari bīdreibys vaļdis prīšksādātuoja). Par aktivū dorbu latgaliskajā kulturvidē, par latgalīšu volūdys i kulturys populariziešonu naviņ Latvejā, bet ari uorzemēs, tyka nomināta Latgalīšu kulturys gada bolvai «Boņuks 2020».
2021. gods Vinetai beja izaicynuojumu laiks – jei dorbojās bīdreibā «LgSC», i ari itymā godā eistynoj dažaidus ar latgalīšu kulturvidi saisteitus projektus, tūmār niu latgaliskuos aktivitatis ir palikušs hobeja leiminī. Paguojušajā godā jei pamaineja dorbu – turpynoj dzeivuot Rēzeknē, bet struodoj Vaļsts meža dīnastā par sabīdryskūs attīceibu specialisti. Vinetai ir svareigi giut jaunu pīredzi, cytaižuok pasavērt iz dzeivi, napalikt iz vītys, bet maineitīs i augt...