18. oktobrī nūtyka pyrmuos latgalīšu dzejis antologejis “Kūkle” (1914) svātki Vabalē.
Asam iz tīni pasaukti cykla nūtikšonu “Latviešu grāmatai 500” koņtekstā, i ir labi tai. Gruomotu skaiteituoji tok vysā Latvejā, pat juos dziļuokajūs laukūs, a Vabale vyspuor nikod nav bejuse proviņce: tyvai pi satiksmis ceļu, rūseigī grafi Plateri-Zibergi ar sovom dzymtom, dzeivuo, vītejūs ļaužu labi saturātuo vide myusu dīnuos. Vacais parks (pat ar eksotim, kū Lidejai Leikumai atkluoj Valentins, a jam sovulaik paruodejs Svylāns) i Skryndu muzejs – vierteiba par sevi. Da nasenejam te i vydsškola turējuos...
Gruomotys dīnai Vabalē dūts moto nu “Kūklis”: “Lai kūklej, kas muok; lai vuicuos, kas namuok”... Pasuokumam treis dalis: 1. Tikšonuos ar Lauru Melni, komiksa “Sunāns breiveibā” (2023) teksta autori, i zeimiejumu konkursa nūslāgums školānim (skaisti dzīd Brigita); 2. Literaturzynuotnīka Valentina Lukaševiča stuosts par gruomotys ceļu leičulūčim cauri godu symtim; 3. Lidejis Leikumys īskots latgalīšu raksteibā laikūs nu pyrmuos latgalīšu gruomotys “Evangelia toto anno..” (1753) da myusu dīnu. Ekskluziva vareiba – duorgumu pošim paturēt rūkuos!
Vēļ i sovstarpeigys duovonys, vīsu i bārnu baruošona, bolvys zeimiejumu konkursa lobuokajim autorim. Eipaša bolva – “Dyrbynu” dzīsmis, kuo na tik vuordus, a i melodejis nazkod aizrakstejs Ontons Skrynda. Paļdis, Anna, paļdis, “Dyrbyni”, – skanēja breineigi!
SIRSNEIGS PAĻDIS, Vabale (breineigs šūbreid, i tok jau cytim laikim taipat, ir tovs parks!) i vabalīši (muzeja saimineicys ir dzeivais zalts!)! A vieliejums – ceļu jaunajim, kam duorgs ir seņču monts!
Lidejis Leikumys teksts
Foto - Laura Melne i Lideja Leikuma Vabalis parkā