1. augustā Viļānūs, Viļānu Nūvoda pietnīceibys muzejā nūtyka Oduma Mickeviča Poznanis Universitatis profesoris Nikolis Nauys (Nicole Nau) sastateituos vuordineicys, kurys pamatā ir pūļu etnografis Stefanejis Uļanovskys Viļānu apleicīnē pīraksteituos puorsokys, prezentaceja.
Jaunuos vuordineicys “Seven hundred Latgalian words. A dictionary based on Stefania Ulanowska’s collection of fairytales from 1895. With morphological and lexicological analyses” (“700 latgalīšu vuordu vuordineica, kas taiseita iz Stefanejis Uļanovskys puorsoku (1895) pamata, ar morfologiskim i leksikografiskim komentarim”) prezentaceju vadeja literaturzynuotneica Ilga Šuplinska, bet sveicīņa vuordus Nikolei veļteja Viļānu Nūvoda pietnīceibys muzeja vadeituoja Margarita Skangale i Stefanejis Uļanovskys dorbu pietneica, Rēzeknis Tehnologeju akademejis studeju prorektore Angelika Juško-Štekele. Taipat ar muzyku saguojušūs prīcynuoja Viļānu kulturys noma kapela “Bumburneicys”, kuru repertuarā ari ir S. Uļanovskys savuoktuos dzīsmis.
Prezentacejā profesore īpazeistynuoja ar jaunuos vuordineicys saturu, sastateišonys principim, kai ari pīduovuoja nalelu īsavieršonu vuordu izalaseišonys metodikā. Kai nūruodeja N. Naua, ideja par vuordineicys vajadzeibu sovulaik bejuse jau pošai etnografei S. Uļanovskai – juos raksteitajuos viestulēs, syutūt Viļānu apleicīnē savuoktūs materialus publiciešonai, beja pīzeime, ka vajadzeibys gadīnī varūt sastateit ari vuordineicu, bet varbyut i taidys navajadziešūt, kam vysi materiali ir burtiski tulkuoti pūļu volūdā.
Ideja par taišni itaidu vuordineicu rodusēs sovulaik Viļānūs reikuotajā Stefanejai Uļanovskai veļteitajā ekspedicejā 2017. godā. Nu 53 puorsoku atlaisets ap 700 vuordu, taipat kotram vuordam kluotyn ir pīmārs nu puorsokys, iz myusu dīnu ortografeju puornasta transkripceja, vuorda originals, kai ari tulkuojums angliski i pūļu volūdys variants, kas pamasts Uļanovkys versejā. Portalam lakuga.lv profesore Nikole Nau atkluoj, ka tikū pabeigtais izdavums nav vīneigais, pi kuo jei niu struodoj, turpynojūt pieteit latgalīšu volūdu.
Vuordineicu izdeve O. Mickeviča Poznanis Universitate, drukuotā formatā tū nūpierkt navarēs, bet ka kaidys Latgolys bibliotekys voi školys grib izdavumu sovā eipašumā, var sasazynuot ar vuordineicys autori, profesori Nikoli Nau.
Atkluošonā kluotyn beja kai vītejī ļauds, tai latgalīšu volūdys i Uļanovskys dorbu pietnīki
(Informaceja i foto nu Edeitis Laimis roksta portalā lakuga.lv)