“Ari nu cierva var izvirt virīni...” ar taidu dūmu i devizi lelā sirsneibā taišni Dvieseļu dīnā (2. novembrī) Latgolys industrialuo tehnikuma Izgleiteibys programys eistynuošonys vītā Dagdā atmiņu reitā tyka svieteiti Latvejis slovonuos kulinaris, riezeknītis Antoninys Masiļūnis 2022. godā atjaunuotuos "Povuoru gruomotys" svātki.
Par dorbu pi izdavuma pastuosteja redizaina idejis autore (jei beja muokslineica 1992. godā tautā lelā tiražā izguojušajai Masiļūnis gruomotai) Rēzeknis Tehnologeju akademejis doceņte Diāna Apele, sovā pīredzē i atkluosmēs dalejuos jaunuo izdavuma dizainere Valentina Siņakova i fotografeju autore Zaiga Pettere, par gruomotys volūdu runuoja žurnaliste Maruta Latkovska.
Latgolys industrialuo tehnikuma profesionaluos izgleiteibys školuotuojis Sarmeitis Meļnikovys vadeibā beja organizāta iedīņu meistarklase. Piec Masiļūnis receptu kai sieņs piec leita auga gordu gordī virīni nu rudiņa karaliskuos ūgys kirba (garbuza) i cytu duorzuoju. Beja sajiuta, ka poša Ninys kuņdze te vysam kluot stuoviejuse... Te eistyn leidza dorbuojuos juos puorlīceiba, ka iedīņu taiseišona ir cīši rodūšs process, kurā zineigs kukars ari ar pīticeigu produktu daudzumu var pabaruot lelu ļaužu pulku. Nu i skaidruoks par skaidru, ka ar taidu attīksmi svātki izadeve vīnkuorši breineigi. Paļdis vysim!
Pasuokums beja tik izadevs i īdvasmojūšs, ka nūlamts taidu meistardarbneicu reikuot ari Rēzeknis tehnikumā, kur ar jaunū gruomotu i senejom receptem varēs īsapazeit ari jaunīši, jo te teik eistynuotys programys “Ādynuošonys pakolpuojumi” i “Puortykys produktu tehnologeja”.
Iz tikšonūs latgaliskūs garšu darbneicā Rēzeknē!
-2°C 3.2 m/s