(Svātais Mišs, guojīņs, sesejis i Latgolys politiskais barometrs)
Nu 27. da 29. apreļa Rēzeknē nūtiks Latgolys kongress “Latgaliskuma kods Eiropā: nu volūdys da ekonomikai”.
Tys īsasuoks 27. aprelī pļkst. 14.00–16.00 ar svineigū Mišu Rēzeknis Jezus Sirds katedralē, piec tam paradzāts guojīns, kas nu katedralis virzeisīs gar pīminekli F. Trasunam, N. Rancānam, pīminis zeimi F. Kempam, dzejnīkam O. Kūkuojam, izdeviejam V. Luočam, guojīns nūsaslēgs Latgolys symtgadis kongresa pīminis vītā. Kongresa pyrmajā dīnā pļkst. 16.00–18.00 nūtiks delegatu, daleibnīku i gostu registraceja Latgolys viestnīceibā GORS (Piļs īlā 4), pļkst. 17.00 paradzāta izstuodis “Lobs ar lobu sasatyka” (kū sagatavejuse bīdreiba “Latgolys etnografiskuo viestnīceiba”) atkluošona GORĀ. Kongresa oficialuo atkluošona GORĀ byus pļkst. 18.00, tam sekuos furšets “Latgolys garšys” i koncerts.
Kongresa ūtrā dīnā – 28. aprelī – dorbs nūtiks Rēzeknis Tehnologeju akademejā (Atbreivuošonys alejā 115) vīnlaiceigi vairuokuos sesejuos. Pļkst. 9.00–15.30 referati i diskusejis par aktualajim vaicuojumim byus sadaleiti četruos grupuos: 1) latgalistika (izgleiteiba), kur uzmaneiba tiks pīvārsta taidim vaicuojumim kai: Plašsazinis leidzekļu kanali, viestejuma pamatakcenti. Latgalīšu volūda voi nūvodvuiceiba školā: pīredze i perspektive. Digitalizacejis tyvuokuo perspektive. Myusdīneigi vuiceibu materiali, atbylstūša vide i sagataveits pedagogs. Tradicionaluo kultura i namaterialais montuojums. 2) latgalistika (volūda): Volūdys politika: Latvejā, akcenti latgaliskajam. Vaļsts volūdys lykums i cyti normativī akti. Praktiskuo latgalīšu volūda. Piļsūniskuo leidzīsaiste, jaunīši. Piļsūniskuos organizacejis kai kūpīnys ideju nesiejs, atteisteituojs, vydutuojs storp vaļsts i vītejū puorvaļdi i sabīdreibu. 3) tīseibys, viesture, drūšeiba: Latgalīšu volūda i pošvaļdeiba. Demokrateja, breiveiba, ideņtitate = drūšeiba. Svareigī nūtykumi Latgolys viesturē. Latgalīšu volūda publiskajā telpā. Pošvaļdeiba, administrativi teritorialuo reforma i Latgola kai teritorialuo vīneiba Latvejā. 4) ekonomika: Izgleiteiba i uzjiemiejdarbeiba Latgolys atteisteibai. Lauku teritoreju atteisteiba Latgolā. Latgolys zynuošonu ekonomika i eksportspieja. Strategiski svareigys prioritatis uzjiemiejdarbeibys atteisteibai. Piec tam pļkst. 15.30–17.30 paradzātys vairuoku projektu prezentacejis: Jurs Urtāns “Jaunatkluotī Latgolys piļskolni”, Aina Strode i Ieva Širiņa “Burtu vuoceleite”, Iveta Balčūne “Lūznovys i Lelbornis muižys”, Diāna Apele, Valentina Siņavska i Maruta Latkovska par Antoninys Masiļūnis “Povuoru gruomotu”. Paraleli prezentacejom nūtiks ari kontaktu birža, kurā kotrs daleibnīks varēs pīsasaceit i eisi izrunuot sovu vaicuojumu ar kluot asūšajom atbiļdeigajom personam voi kongresa delegatim.
Trešā dīnā – 29. aprelī – kongresa dorbs otkon turpynuosīs Latgolys viestnīceibā GORS. Vyspyrma pļkst. 9.00 byus Latgolys politiskais barometrs, kurā aicynuoti pīsadaleit tū parteju lideri, kas aptaujuos pasaruoda viers 1 %, pretendejūt iz nuokušū Saeimu. Ite gaideisim atbiļdis iz vaicuojumu, kū jī ir darejuši i kū dareis Latgolys lobā. Piec tam pļkst. 11.30–16.30 nūtiks nūslāguma plenārsēde (ar Saeimys leidzdaleibu) i rezolucejis pījimšona nuokušajim pīcim godim. Kongress nūsaslēgs ar vokora koncertu, kurā planavuota sasatikšona ar dažaidim Latgolys muokslinīkim.
Vaira par Latgolys kongresu 2022 var uzzynuot sātyslopā latgolyskongress.lv.