Pavysam naseņ – novembra beiguos – pi skaiteituoju sovu ceļu uzsuokuse jauna dzejis gruomota “Spuornu golu šolks” (latvyski ‘zīds’), kurys autore ir dzejneica INETA ATPILE-JUGANE. Jaunuo gruomota aicynoj īsaviert Inetys sajiutu pasaulī caur vuordu i šolka ceļu, kas atkluots autoris jaunuokajūs dzejūļūs latgaliski i breineigā fotostuostā. Inetys muosys fotografis Aritys Atpilis-Donys veiduotais vizualais stuosts, kuru izdzeivoj poša dzejneica, ir par izjiutu gaiseigumu i vīglumu, kas soveigs viņ i vīneigi šolkam.
Itys gods Inetai ir bejs cīši rodūšs – septembrī izguoja juos i jaunuos muokslineicys Īvys Širinis kūpdorbs – gruomateņa latgalīšu rokstu volūdā pošim mozuokajim skaiteituojim “Burtu vuoceleite”. I vieļ vīns puorsteigums pošai i cytim – novembrī suoce skanēt jauna dzīsme ar Inetys vuordim “Pietura”, kū izpylda Ģirts Ločmelis (jis ir ari dzīsmis muzykys autors). Itymā godā Ineta ar muosu Aritu realizēja projektu “Katram sava laimes poga” – sarunuos i fotografejuos Latgolys cylvāki Inetai i Aritai atkluoja sovys nūzeimeiguokuos vītys, lītys, nūtykumus (projekta roksti i fotografejis beja publicāti laikrokstā “Vietējā Latgales Avīze”). Lai ari pandemejis gods, sarunys laikā Ineta atkluoj, ka itys ir bejs cīši rodūšs i bogots gods...