Ar Nautrānu pogostu niu ir īspieja īpasazeit latgaliski! Nautrānu pogosta karte ir unikala ar tū, ka tī ir atlykti ap 920 vītvuordu. Dūma par karti beja jau seņ, tik vysu laiku tyka atlykta. Itūgod Rēzeknis nūvoda pošvaļdeiba izsludynuoja Latgaliskuos identitatis atbolsta programu, i tyka nūlamts karti taiseit latgaliski!
Kartis izveide tyka uztycāta Latvejis Geotelpiskuos informacejis agenturys kartografei Andrai Zubko-Melnei, kurys sirdslīta ir ari Nautrānu pogosta nūvodpietnīceiba. Piec juos iniciativys karte topa cīši eipaša – na tik latgaliski, bet ari ar atlyktim ap 920 vītvuordim, kū Andra ir vuokuse daudzus godus. Andra: “Itys projekts ir kei liecīņs pādejā viļcīņa vagonā, partū ka vītejūs īdzeivuotuoju dzeraunēs palīk arviņ mozuok, kuo rezultatā bīži viņ puortrykst tūs nūdūšona nu paaudzis iz paaudzi.”
Kartis izveidis procesā tyka apzynuoti daudzi nautrānīši, kas varēja pastuosteit par pogosta vītvuordim i tūs atsarasšonu dobā. Lels atspaids vītvuordu apzynuošonā beja Ciprijana Pokrotnīka 1970./1971. goda būrtneicys ar Nautrānu pogosta vītvuordu pīrokstim, kū Andrai nūdeve Kristīne Pokratniece. Vysus būrtneicuos pīraksteitūs vītvuordus vēļ nav izadevs atlikt kartē, tok tei tiks papyldynuota ar jaunu informaceju. Nautrānu sporta hallē – KN tiks izvītuota karte, kurā īdzeivuotuoji varēs veikt papyldynuojumus.
Kartē informaceja ir raksteita Nautrānu izlūksnē, i nūtyka ari lela sadarbeiba ar volūdys konsultantem Annu Stafecku i Lauru Melni. Kartis sajims Nautrānu vydsškola i Nautrānu nūvodpietnīceibys muzejs. Digitali karte byus pīejama Rēzeknis nūvoda sātyslopā. Kartē ir īvītuots QR kods, kurs aizvad iz Rēzeknis nūvoda sātyslopys Nautrānu pogosta sadaļu. Tī ir ari apkūpuota informaceja par turisma i uzjiemieju pīduovuojumu kai Nautrānu pogosta gostim, tai i vītejim dzeivuotuojim.
Kartis atkluošona nūtyka zeimeigā datumā – Andryva dīnā. Leidz ar tū tyka pasvieteita Andryva Jūrdža pīmiņa pi sylta piparmātru čaja i capumim. Sorkonuos lentys puorgrīzšona tyka uztycāta vacuokajam i jaunuokajam pasuokuma daleibnīkam – Inārai Gleizdei i Sofijai Martinovai, kas sovā veidā simboliski paruoda zynuošonu nūdūšonu nuokamom paaudzem.
Sirsneigs paļdis par sadarbeibu i atbolstu – Rēzeknis nūvodam, Andrai Zubko-Melnei i Sandrim Keišam, Mārim Deksnim, APV “Lāde” i kotram, kas paleidzēja projektu realizēt!
Iz prīšku ir padūmā turpynuot vītvuordu pieteišonu, apkūpojūt nūstuostus par tūs izceļsmi, informej Nautrānu apvīneibys puorvaļdis Kulturys centra i projekta “Vides stends “Nautrānu pogosts”” vadeituoja Inga Vigule
Arvīda Gļaudys foto