Apstyprynuota Latgolys kongresa programa, ruodūt, ka pyrmuo dīna ir veļteita Latgolys kongresa dīnys gūdynuošonai: pasuokumi suocās 14.00 ar Svātū Misi Jezus Sirds katedralē, turpynojās ar guojīni i zīdu nūlikšonu pi Latgolys kulturys i politiskūs darbinīku pīminis zeimu. Guojīnī i zīdu nūlikšonā aicynuotys pīsadaleit ari Rēzeknis izgleiteibys īstuodis, vysi, kas gūdynoj Latgolys viesturi i myusu sabīdryskūs darbinīkus.
27. apreļa pasuokumi turpynojās Latgolys viestnīceibā GORS: izstuodis atkluošona “Lobs ar lobu sasatyka”, Latgolys kongresa svineiga atkluošona i svātku koncerts, kurā pīsadola Rēzeknis simfoniskais orkestris, atskaņojūt vysaidu stylu myzykys aranžiejumus, i solisti.
28. apreļa nūtikšonys – Rēzeknis Tehnologeju akademejā. Nu 9.00 da 15.30 zynuotniski praktiska daļa ar prīšklasejumim i diskusejom par rezolucejai aktualim vaicuojumim. Nu 15.30 da 17.30 nūteik gruomotu i praktiskys darbeibys rezultatu prezentacejis. Paraleli prezentacejom – “Kontaktu birža”, kurā sevkurs daleibnīks var pīsasaceit iz 10 minušu sarunys ar sevkuru kluot asūšū, dybynojūt kontaktus, turpynojūt diskuseju ci vīnojūtīs par kūpeigys idejis atteisteibu. Dīnys nūslāgumā Rēzeknis teatrī “Joriks” varēs nūsavērt Mārtiņa Eihis Latgolys pūdnīceibai veļteitū izruodi “Muols”. Tam ir svareigi pīsasaceit laikā, kam vītu nav daudz.
29. aprelī Latgolys kongress atsagrīž GORĀ. Dīnys suokumā (9.00–11.00) paradzāta politiska diskuseja ar parteju liderim, kas reitingūs pīsacejuši sevi par kandidatim iz Saeimys vieliešonu. Loba vareiba nūskaidruot, vaicojūt, kas ir padareits Latgolys, t.sk. latgalīšu volūdys, atteisteibai i kū jī īceriejuši i apsajam dareit nuokušā periodā. Dīnys centralais nūtykums – nūslāguma plenarsēde, kur pyrmajā daļā Saeimys deputatu pīsadaleišona, ūtrā daļā – rezolucejis pījimšona. Nūslāgumā, nu 18.00, sasatikšona ar Latgolys dzejnīkim, muzikim, kino i performanču veiduotuojim, īsajiutūt i ļaunūtīs latgalīšu volūdys skaniejumam i muokslinīku šarmam. Aktualuo informaceja par Latgolys kongresu: www.latgolyskongress.lv