Rubrika “Latgolys avīzēs pyrms 100 godu”
“Pastōvēs, kas mainēsīs” – itī Raiņa vōrdi pādejūs pōrs godu laikā skaņ bīži un eistajā laikā. Ari puslapeņā “Byusim vītejī” 2022. godu sōcam ar jaunu rubriku, kurā pa numerim vērsimēs, par kū latgalīšu avīzis ziņōja taišni pyrms 100 godu. (Tys ir īspiejams, pasateicūt Latvejis nacionalōs bibliotekys izveidōtajam e-resursam “Digitālie laikraksti”.)
1922. godā Latgolā teik izdūtys divys avīzis: Latgolas Kristigu Zemniku Sawinibas avize “Latgolas Wōrds” (tūlaik drukōts tipografejā “Dorbs un Ziniba” Rēzeknē, redakceja un kantors beja Lelō Nikolaja īlā 38) un politisks, sabīdrisks un literarisks nedeļas laikroksts zemnīkim “Latgalīts” (tūlaik drukōts tipografejā “Grōmota” Rēzeknē, redakceja beja Reigā, Marijas īlā 42-24, bet sludynōjumus, riekinus varēja syuteit iz adresi Rēzeknē, Lelō Nikolaja īlā 33).
Citātūs raksteiba saglobōta maksimali tyva publikacejis originalam, vīneigi lītots garais o burts, dubultais w aizstōts ar v, kai ari meikstynōjumi vōrdūs pīlāgōti myusdīnu laseitōja acim (lia – ļ, nia – ņ, nio - ņo utt.). Taipoš kvadratīkovōs piec rokstim īlykts autors/ pseidonims, jo taids bejs mynāts rokstā.
Tod nu dūdamēs ceļōjumā iz pogōtni, kurā ir gon daudz izgleitojūša (damierstu voi nazynomu faktu), gon ari viesturiski nūpītna un sadzeiviski smīkleiga. A poši ikdīnā turpynōsim dzeivōt, paturūt prōtā dūmu, ka ari myusu dorbi piec 100 godu var tikt izlykti apskatei... Dzeivōsim tai, lai myusu piectečim byutu lapnums par latgalīšim 2022. godā!