Decembrī mādzam pasaviert iz aizejūšuo goda spylgtuokajim nūtykumim gon lokalā leiminī – sovā i sovu tyvejūs cylvāku dzeivēs –, gon arī globalā leiminī – vaļsts voi pasauļa kontekstā. Kab atguoduotu, kas tod lobs i nūzeimeigs ir nūtics latgalīšu kulturā, cīši vierteigs materials ir portala lakuga.lv sagataveituos latgaliskuos kulturys viests, kas itymā godā (suocūt ar maja mieneša apskotu) pyrmū reizi pasaruodejušs video formatā. Zinis stuosta DĀVIS SUHAREVSKIS – kinys “Piļsāta pi upis” golvonuos lūmys atveiduotuojs i Leluo Kristapa bolvys laureats, kurs ir jauns cylvāks nu Latgolys – ar breineigu stuostnīka talantu, lobu humora izjyutu i sovu vīdūkli. Dzeivuodams Reigā, jis naaizmierst latgalīšu volūdu i sovu dzymtū pusi Gaigalovu.
2020. goda kinys “Piļsāta pi upis” pamatā ir attīceibu stuosts – mīlesteibys treisstyurs – iz paguojušuo godu symta 30.–40. godu viesturiskūs nūtykumu puormaiņu fona. Golvanajā lūmā ir Dāvis Suharevskis, kurs atveidoj maļavuotuoju Aņsi, kurs izīt cauri vairuokom varom. Režisora Vīstura Kairiša latgaliski uzjimtuo kina ir sajāmuse četrys Nacionaluos kino bolvys “Lielais Kristaps” statuetis. Nacionalū kino bolvu “Lielais Kristaps” sajēme Dāvis Suharevskis par lobuokū aktīrdorbu pyrmuo plana lūmā (itei jam ir pyrmuo kinolūma), čehu aktrise Brigita Cmuntova par lobuokū aktīrdorbu ūtruo plana lūmā, Ludvīks Bohadlo i Roberts Slezaks par lobuokū skaņu režeju, kai ari Vīsturs Kairišs par lobuokū scenareju. Kina ir sajāmuse ari Latgalīšu kulturys goda bolvu “Boņuks 2020”...